Leviticus 14

Ukuhlanjululwa emikhuhlaneni ethelelwanayo

1UJehova wathi kuMosi, 2“Le yimithetho eqondana lalawo olesifo ngesikhathi sokuhlanjululwa kwakhe ngokomkhuba nxa elethwa phambi komphristi. 3Umphristi kaphume ezihonqweni ayemhlola. Nxa umuntu lowo esesilile kuleso sifo sejwabu esithelelwanayo, 4umphristi uzalaya ukuthi kulethelwe ohlanjululwayo izinyoni ezimbili eziphilayo ezihlanjululwayo kanye lenkuni zesihlahla somsedari, intambo ebomvu lehisophi. 5Lapho-ke umphristi uzalaya ukuthi eyinye yalezo nyoni ayibulawelwe phezu kwamanzi acengekileyo asembizeni yomdaka.

6Lapho-ke kathathe inyoni ephilayo ayigxamuze ndawonye lokhuni lomsedari, intambo ebomvu lehisophi egazini laleyo nyoni ebulawelwe phezu kwamanzi ahlambulukileyo. 7Uzachela lowo ohlanjululwa leso sifo esithelelwanayo ngalelogazi kakhombisa abesesithi usehlambulukile. Abe esekhulula inyoni esaphilayo izihambele egangeni.

8“Umuntu okufanele ukuthi ahlanjululwe kumele agezise izigqoko zakhe, aphuce zonke inwele zakhe abe esegeza umzimba ngamanzi, ngalokho uzabe esehlambulukile ngokomkhuba. Ngemuva kwalokho usengangena ezihonqweni, kodwa kumele ahlale ngaphandle kwethente lakhe okwensuku eziyisikhombisa. 9Ngosuku lwesikhombisa kumele aphuce zonke inwele zakhe, lentshiya zakhe kanye lazo zonke inwele zakhe. Kufanele agezise izigqoko zakhe ageze umzimba ngamanzi; ngalokho uzakuba ngohlambulukileyo.

10“Ngosuku lwesifica mibili kumele alethe amazinyane amabili amaduna lelilodwa elisikazi wonke elomnyaka owodwa, wonke engelasici, ndawonye lezilinganiso ze-efa ezintathu etshumini zefulawa ecolekileyo evutshwe ngamafutha kungumnikelo wamabele, kanye lohetshezana lwamafutha. 11Umphristi obikayo ukuthi usehlambukile lowo muntu nguye omethulayo kanye leminikelo yakhe kuJehova esangweni leThente lokuHlanganela.

12Ngemuva kwalokho umphristi kathathe elinye izinyane eliduna anikele ngalo kube ngumnikelo wesono, kanye lohetshezana lwamafutha; uzakuzunguza phambi kukaJehova kungumnikelo wokuzunguzwa kwayo.

13Uzabulala lelozinyane endaweni engcwele lapho okubulawelwa khona iminikelo yesono kanye lemihlatshelo yokutshiswa. Umnikelo wecala ungowomphristi, njengomnikelo wesono; ungcwele kakhulu. 14Umphristi elinye igazi lomnikelo wecala alininde oqwangeni lwendlebe yokunene yalowo ozahlanjululwa, esithupheni sesandla sokunene salowo.

15Umphristi uzathatha amanye amafutha, awathele esandleni sakhe sokhohlo,

16agxamuze umunwe wakhe wenkomba emafutheni lawo, abesewafafaza phambi kuka Jehova kakhombisa. 17Amafutha aseleyo esandleni umphristi kawaninde oqwangeni lwendlebe yokunene yalowo ozahlanjululwa, esithupheni sesandla sokunene lasezwaneni elikhulu lonyawo lokunene, phezu kwegazi lomnikelo wecala. 18Amafutha lawo aseleyo esandleni somphristi kawagcobe ekhanda lalowo ohlanjululwayo abesemenzela indlela yokubuyisana phambi kuka Jehova.

19“Ngemva kwalokho kalethe umnikelo wesono ecelela ozahlanjululwa intethelelo kulokhu kungcola kwakhe. Ngemva kwalokho, umphristi uzabulala umnikelo wokutshiswa

20anikele ngawo e-alithareni, kanye lowamabele, amenzele indlela yokubuyisana, ngalokho uzahlanjululwa.

21“Kodwa-ke, nxa engumyanga, engenelisi lezizinto, kumele athathe izinyane lemvu eliduna libe ngumnikelo wecala ozazunguzwa ukumenzela indlela yokubuyisana lengxenye eyodwa etshumini yefulawa ecolekileyo ehlanganiswe lamafutha kungumnikelo wamabele, lohetshezana lwamafutha,

22lamajuba amabili kumbe abantwana benkwilimba ababili, lokho angakwanelisa, okunye kungumnikelo wesono kuthi okunye kube ngumnikelo wokutshiswa.

23“Ngosuku lwesificamibili kumele akulethe kumphristi ukuba ahlanjululwe esangweni leThente lokuHlanganela, phambi kukaJehova.

24Umphristi kathathe izinyane lemvu libe ngumnikelo wecala, ndawonye lohetshezana lwamafutha, akuzunguze phambi kukaJehova kube ngumnikelo wokuzunguzwa. 25Uzabulala izinyane lemvu kube ngumnikelo wecala abesethatha elinye alininde oqwangeni lwendlebe yokunene yalowo ozahlanjululwa, esithupheni sesandla sokunene kanye lasezwaneni elikhulu lonyawo lwesandla sokunene. 26Umphristi uzachathekela amanye amafutha esandleni sakhe senxele,

27kubesekusithi ngomunwe wakhe wenkomba wesandla sokunene achele amanye amafutha kasikhombisa phambi kuka Jehova. 28Kuthi amanye amafutha asesandleni sakhe awaninde kulezo ndawo aninde khona igazi lomnikelo wecala oqwangeni lwendlebe yokunene yalowo ozahlanjululwa, esithupheni sesandla sokunene kanye lasezwaneni elikhulu lonyawo lwesandla sokunene. 29Umphristi uzagcoba ikhanda lalowo ohlanjululwayo ngamafutha aseleyo esandleni sakhe, emenzela indlela yokubuyisana phambi kuka Jehova. 30Ngakho uzanikela ngamajuba lawayana loba abantwana benkwilimba lezo, lokho ayabe ekwenelisile,

31okunye kungumnikelo wesono kuthi okunye kube ngumnikelo wokutshiswa, ndawonye lomnikelo wamabele. Ngale indlela umphristi uzamenzela indlela yokubuyisana phambi kukaJehova lowo ozahlanjululwa.”

32Le yiyo imithetho yokuphathwa kwalabo abalomkhuhlane wejwabu othelelwanayo abangenelisi iminikelo yokuhlanjululwa ejwayelekileyo.

Ukuhlanjululwa kwabalesikhwekhwe

33UJehova wathi kuMosi lo-Aroni, 34“Nxa lingena ezweni laseKhenani, lelo engilinika lona libe yisabelo senu, ngibe sengifaka isikhwekhwe esithelelwanayo endlini kulelo lizwe, 35umnini waleyondlu kufanele ayetshela umphristi athi ‘ngibona okufanana lesikhwekhwe endlini yami?’ 36Umphristi engakayi kuleyondlu ukuyahlola isikhwekhwe kumele akhiphe isiqondiso sokuthi kutshiswe konke okukuleyondlu ukuze kungabi lalutho kuleyondlu oluzathiwa lungcolile. Ngemva kwalokho umphristi uzangena ahlole leyondlu.

37Uzahlola isikhwekhwe emidulini, kuthi nxa ebona ukuthi kulamabala aluhlaza loba abomvana emdulini njalo ebonakala ejulile emdulini, 38umphristi uzaphuma ngomnyango wendlu awuvale okwezinsuku eziyisikhombisa.

39Ngosuku lwesikhombisa umphristi uzabuyela ayehlola leyondlu. Nxa isikhwekhwe sesigcwele emidulini, 40uzakhupha isiqondiso sokuthi amatshe alaleso sikhwekhwe adilizwe ayephoselwa endaweni engcolileyo ngaphandle kwedolobho. 41Kalaye ukuthi imiduli yonke eyangaphakathi iphalwe kuthi lokho okuphaliweyo kuyelahlelwa endaweni engcolileyo ngaphandle kwedolobho.

42Besebefaka amatshe amatsha esikhundleni salawo bagudule indlu ngodaka olutsha.

43“Nxa isikhwekhwe sibonakala kutsha kuleyondlu ngemva kokudilizwa kwamatshe lokuphalwa kwemiduli njalo isigudulwe,

44umphristi kahambe ayeyihlola, nxa efumana isikhwekhwe sesiqhelile kuleyondlu, kuyabe kuyisikhwekhwe esibulalayo; leyondlu ingcolile. 45Kufanele idilizwe – amatshe ayo, izigodo lodaka lwayo kumele kuyephoselwa endaweni engcolileyo ngaphandle kwedolobho.

46“Loba ngubani ongena kuleyondlu ngesikhathi isavaliwe uzakuba ngongcolileyo kuzekube kusihlwa. 47Loba ngubani ozalala loba adlele kuleyondlu kufanele agezise izigqoko zakhe.

48“Kodwa umphristi angabuya ezoyihlola afumane ukuthi isikhwekhwe asiqhelanga ngemva kokugudulwa, uzakuthi indlu ihlambulukile, ngoba isikhwekhwe singasekho.

49Ukuze indlu ibe ngehlanzekileyo uzathatha izinyoni ezimbili kanye lenkuni zesihlahla somsedari, lentambo ezelukiweyo ezibomvu lehisophi. 50Uzabulalela enye yalezi zinyoni emanzini acengekileyo embizeni yomdaka.

51Abesethatha inkuni zesihlahla somsedari, ihisophi, intambo ebomvu eyalukiweyo lenyoni esaphilayo, akugxamuze egazini lenye ebuleweyo lamanzi acengekileyo, abesechela leyondlu kakhombisa. 52Uzayihlanza leyondlu ngegazi lenyoni, amanzi acengekileyo, inyoni esaphilayo, inkuni zesihlahla somsedari, ihisophi lentambo ephothiweyo ebomvu.

53Ngemva kwalokho kakhulule inyoni esaphilayo emangweni ngaphandle kwedolobho. Ngalindlela uzabe esenze indlela yokubuyisana kuleyondlu, izabe singehlambulukileyo.”

54Le yiyo imithetho eqondane lesifo sejwabu esithelelwanayo, ukuluma komzimba,

55isikhwekhwe ezigqokweni kumbe endlini,

56ukuvuvuka, ukuqubuka kumbe itshatha elikhanyayo, 57ukuze kubonakale ukuthi ulutho luhlambulukile loba lungcolile. Le yiyo imithetho yezifo zejwabu ezithelelwanayo kanye lesikhwekhwe.